Lífeyriseignir landsmanna hækkuðu um 773 milljarða á árinu 2020 þrátt fyrir óvissu á eignamörkuðum vegna COVID-19 heimsfaraldursins og nema nú rúmlega tvöfaldri landsframleiðslu. Þetta kemur fram í tilkynningu frá Landssambandi lífeyrissjóða.

„Erlendar eignir sjóðanna jukust mikið og nam hækkun þeirra yfir helming af allri hækkun lífeyriseigna á árinu. Eru erlendar eignir nú um 35 prósent af öllu eignasafni samtryggingar og séreignar lífeyrissjóðakerfisins. Aðrar breytingar á eignaflokkum lífeyrissjóðanna á árinu voru að eignir í sértryggðum skuldabréfum jukust allnokkuð ásamt eignum í hlutabréfum og skuldabréfum fyrirtækja en sjóðfélagalán drógust saman. Helstu ástæður minnkandi sjóðfélagalána voru miklar uppgreiðslur á árinu,“ segir í tilkynningunni.

Lífeyrissparnaður landsmanna nam rúmlega 6.000 milljörðum við árslok 2020 og skiptist niður á 5.119 milljarða króna í samtryggingadeildum lífeyrissjóða, 595 milljarða hjá séreignardeildum lífeyrissjóða og 247 milljarða hjá öðrum innlendum vörsluaðilum séreignarsparnaðar. Einnig er áætlað að um 100 milljarða séu hjá erlendum aðilum sem bjóða sparnað í sérsniðnum lífeyristryggingum.