LearnCove er hluti af Sjávarklasanum og er hugbúnaðurinn þegar í notkun hjá fjölbreyttum hópi fyrirtækja í sjávarútvegi hér heima og erlendis. Hugbúnaðurinn nýtist jafnt fræðsluaðilum, framleiðendum tækjabúnaðar og útgerðarfyrirtækjum.

Tækjaframleiðendur geta skipt út gömlu handbókinni og sjávarútvegsfyrirtæki nýtt hugbúnaðinn fyrir gæðaferli og fjölbreytta þjálfun starfsfólks í vinnslu og skipum. LearnCove nýtist sérstaklega vel fyrirtækjum með starfsmenn eða viðskiptavini frá mörgum málsvæðum þar sem hugbúnaðurinn styður við sjálfvirkar þýðingar og túlkastuðning á 107 tungumálum.

Í tilkynningu frá LearnCove segir að með notkun hugbúnaðarins til þjálfunar verði starfsemi fyrirtækja skilvirkari og ný tækifæri skapist til vaxtar. Með aðgengilegum ferlum og þjálfun sparist verðmætur tími og kostnaður hvort sem snýr að viðskiptavinum, starfsmönnum eða samstarfsaðilum fyrirtækjanna.

InfoCapital, fjárfestingafélag að stærstum hluta í eigu Reynis Grétarssonar stofnanda Creditinfo, leiddi hlutafjáraukninguna en meðal annarra fjárfesta er Hilmar Veigar Pétursson, forstjóri CCP.

Aðalheiður Hreinsdóttir, framkvæmdastjóri LearnCove.

Aðalheiður Hreinsdóttir, framkvæmdastjóri LearnCove segir töluverð tímamót fyrir LearnCove felast í fjárfestingunni. „Við erum í dag með 1.300 mánaðarlega notendur sem fjölgar hratt með nýjum viðskiptavinum. Við höfum þegar tekið fyrstu skrefin í erlendum vexti með samningum við alþjóðleg fyrirtæki og getum nú blásið til kraftmikillar sölu- og markaðssóknar á nýjum mörkuðum.

Við erum sérstaklega ánægð með að fá inn í eigendahópinn svona sterka og reynslumikla bakhjarla. Við stefnum að því að byggja upp alþjóðlegt fyrirtæki með íslenskar rætur, en bæði InfoCapital og Hilmar Veigar hafa veigamikla reynslu af því.“

Hákon Stefánsson, forstjóri InfoCapital, segir fjárfestinguna vera í fólkinu og teyminu hjá LearnCove og að hann hafi trú á þeirri vegferð sem þar sé í gangi. Teyminu hafi tekist að þróa og innleiða hugbúnað sem skili notendum miklum ávinningi á sama tíma og tækifæri til frekari vöruþróunar liggi fyrir. „Það staðfestir að teymið hefur skýran fókus og um leið aga til að forgangsraða góðum hugmyndum sem getur verið mikil áskorun fyrir frumkvöðla og reyndar í hugbúnaðarþróun almennt. Sú staðreynd að hluti viðskiptavina félagsins hefur átt frumkvæði að því að setja sig í samband við félagið til að hefja viðskipti staðfestir enn frekar að teymið er á réttri leið. Þetta er spennandi verkefni sem við höfum mikinn áhuga á og munum klárlega miðla reynslu okkar og þekkingu.“

Heimsmarkmið sameinuðu þjóðanna

Í tilkynningunni segir að við þróun LearnCove hafi verið horft til heimsmarkmiða SÞ gagnvart umhverfismálum og stuðningi við fjölmenningu. Í því felist fækkun ferðalaga, lenging líftíma tækjabúnaðar og fækkun hráefnistjóna sjávarútvegsfyrirtækja. Með víðtækum tungumálastuðningi og sveigjanlegri nálgun í þjálfun náist stuðningur við fjölbreytta menningu og ólíkan tungumálabakgrunn.