Það blasir við að fyrirtæki landsins munu eiga erfitt með að standa undir launahækkunum sem samið var um í lífskjarasamningnum í fyrra og að fylgja þeim eftir mun við núverandi aðstæður einungis leiða til meira atvinnuleysis en ella. Þetta kom fram í máli Eyjólfs Árna Rafnssonar, formanns Samtaka atvinnulífsins, á aðalfundi samtakanna á miðvikudag.

„Því miður er engin samstaða um það í verkalýðsforystunni að taka mið af aðstæðum, sem eiga sér enga hliðstæða í sögu okkar, né ríkir samstaða um að finna leiðir til að tryggja sem best atvinnu fólks og hag fyrirtækjanna sem greiða laun þess.

Tjón þeirrar sundrungar er þegar orðið mikið og mun fara vaxandi. Fyrir því verður launafólk fyrst og fremst,“ sagði Eyjólfur Árni sem var á fundinum endurkjörinn formaður samtakanna með 96,7 prósent greiddra atkvæða.

Í ávarpi sínu benti Eyjólfur Árni á að frá gerð lífskjarasamningsins, sem hefði einkum haft það markmið að hækka laun þeirra tekjulægri, tryggja sveigjanleika svo unnt væri að stytta vinnuvikuna með upptöku virks vinnutíma, leggja grunn að lægri sköttum og skapa jarðveg fyrir lægri vexti, hefðu aðstæður í efnahagslífinu umturnast.

Enginn hefði getað séð fyrir víðtæk áhrif kórónaveirunnar sem hefði meira eða minna lamað efnahagskerfi heimsins á skömmum tíma.

Mikilvægasta verkefnið framundan væri að ná íslensku atvinnu- og efnahagslífi af stað á ný.

Halldór Benjamín Þorbergsson, framkvæmdastjóri Samtaka atvinnulífsins, og Eyjólfur Árni formaður.
Fréttablaðið/Anton Brink

„Í þeirri baráttu erum við öll á sama báti, enda eru öflugt atvinnulíf og útflutningur undirstaða velferðarsamfélags okkar. Efnahagsaðgerðum stjórnvalda er ætlað að tryggja afkomu fólks og fyrirtækja, verja grunnstoðir samfélagsins og skapa í framhaldinu öfluga viðspyrnu fyrir efnahagslífið,“ sagði í ávarpi Eyjólfs Árna.

Hann nefndi einnig að þrátt fyrir dökkt útlit væri jákvætt að vextir á lánum til fólks og fyrirtækja væru lægri en nokkru sinni fyrr.

„Engu að síður þurfa vextir að lækka enn frekar til að ýta fjármunum úr ríkisbréfum yfir í arðbærar fjárfestingar í atvinnulífinu. Þrátt fyrir að gengi krónunnar hafi látið undan síga á undanförnum mánuðum eru ekki teikn um að það leiði til aukinnar verðbólgu til skamms tíma sem virðist ætla ða haldast innan markmiða Seðlabanka Íslands,“ sagði Eyjólfur Árni.