Gylfi Magnússon, dósent við viðskiptafræðideild Háskóla Íslands og fyrrverandi stjórnarformaður Samkeppniseftirlitsins, segir að nýtt frumvarp sem miðar að einföldun samkeppnislaga dragi tennurnar úr samkeppniseftirliti hér á landi. Þannig sé verið að „láta blauta drauma fákeppnismógúla rætast.“

Heimild Samkeppniseftirlitsins til að skjóta úrskurðum áfrýjunarnefndar samkeppnismála til dómstóla, fyrirkomulag sem mjög hefur verið gagnrýnt af fulltrúum atvinnulífsins, verður afnumin samkvæmt nýju frumvarpi atvinnuvega- og nýsköpunarráðherra þar sem boðaðar eru miklar breytingar á samkeppnislöggjöfinni.

Gylfi skrifar á Facebook síðu sinni að „Einfalda framkvæmd samkeppnislaganna og auka skilvirkni“ hljómi betur en „Láta blauta drauma fákeppnismógúla rætast með því að draga tennurnar úr samkeppniseftirliti á Íslandi eins og frekast er unnt“.

„Nú á að koma í veg fyrir að Samkeppniseftirlitið geti borið niðurstöður áfrýjunarnefndar undir dómstóla og gætt þannig m.a. hagsmuna brotaþola. Jafnframt á að koma í veg fyrir að eftirlitið geti þvingað fram breytingar á skipulagi fyrirtækja þegar ekkert annað virðist duga til að ná fram eðlilegri samkeppni,“ skrifar Gylfi.

„Þetta eru ekki ný baráttumál mógúlanna, hugmyndir í þessa veru hafa oft verið viðraðar áður en ekki fengið brautargengi vegna harðrar andstöðu. Nú sjá þeir hins vegar greinilega lag til að knýja þetta fram.“