Matsfyrirtækið S&P Global Ratings hefur hækkað lánshæfiseinkunn Landsvirkjunar um einn flokk í BBB+ úr BBB með stöðugum horfum. Þetta kemur fram í fréttatilkynningu.

S&P metur það svo að fjárhagsstöða Landsvirkjunar sé sterkari en áður, sem kalli á hækkun lánshæfiseinkunnar. Vel hafi gengið að takast á við þær áskoranir og það krefjandi tímabil sem fylgdi heimsfaraldrinum á síðasta ári.

Landsvirkjun segir í tilkynningu sinni að mikil áhersla hafi verið lögð á að styrkja fjárhagsstöðu fyrirtækisins síðastliðinn áratug og hækka þannig lánshæfiseinkunnina.

Skuldir hafi lækkað mikið og fjárhagsleg áhætta minnkað. Á sama tímabili hafi Landsvirkjun byggt þrjár nýjar aflstöðvar og raforkuvinnslan aukist. Viðskiptavinahópur fyrirtækisins hafi stækkað og fjölbreytni þeirra aukist. Jafnframt hafi tekist vel til við endursamninga við eldri viðskiptavini.

„Við hjá Landsvirkjun fögnum þessari hækkun á lánshæfiseinkunn. Frá 2014 hefur einkunnin hækkað um fjóra flokka. Við erum nú með sambærilega einkunn og helstu raforkufyrirtæki á Norðurlöndum, sem við berum okkur saman við. Það er áfangi sem við höfum unnið markvisst að um langa hríð. Þessi bætta fjárhagsstaða gerði fyrirtækinu kleift að takast á við áskoranir heimsfaraldursins með góðum árangri og við gátum stutt við viðskiptavini okkar. Reksturinn hefur tekið vel við sér á þessu ári og mörg jákvæð teikn á lofti. Við horfum björtum augum fram á veginn og ætlum áfram að styrkja fjárhagsstöðu fyrirtækisins til hagsbóta fyrir eigendurna, sem eru landsfólk allt,“ er haft eftir Rafnari Lárussyni, framkvæmdastjóra fjármála Landsvirkjunar.