GeoSalmo áformar að byggja upp landeldi á umhverfisvænum laxi í lokuðu fiskeldiskerfi á landi vestan Þorlákshafnar. Áætlanir gera ráð fyrir allt að 24 þúsund tonna eldi þegar stöðin verður komin í fullan rekstur, en fyrsti áfangi nemur um 7.300 tonnum. Fyrirtækið ætlar sér að verða leiðandi aðili í þróun fiskeldis á landi á Íslandi og framleiða vöru til sölu á innlendum og erlendum mörkuðum.
GeoSalmo er langt komið með undirbúning að framkvæmdum. Fyrirtækið hefur lagt fram umhverfismatsskýrslu og er umsagnarfrestur fyrir hana nýliðinn. Niðurstaða í leyfismálum mun liggja fyrir á næstu vikum og mánuðum. Allt eru þetta mikilvægir liðir í að framkvæmdir geti hafist.
GeoSalmo hefur einnig samið við norska fyrirtækið Artec-Aqua um hönnun og verkumsjón fyrir verkefnið en það fyrirtæki hefur byggt fiskeldisstöðvar á landi í Noregi.
„Eftirspurn eftir grænu orkunni okkar er miklu meiri en við náum að sinna og við höfum þurft að segja nei við mörgum góðum verkefnum. Við forgangsröðum orkusölunni, meðal annars í þágu aukinnar almennrar notkunar, orkuskipta og nýsköpunar. Fyrirætlanir GeoSalmo um landeldi, með áherslu á sjálfbærni og umhverfisvænan rekstur, falla mjög vel að þessari forgangsröðun okkar,“ segir Hörður Arnarson, forstjóri Landsvirkjunar.
Jens Þórðarson, framkvæmdastjóri GeoSalmo, tekur í sama streng og segist ánægður með áfangann sem leggur grunn að orkusamningi við Landsvirkjun.
„Vinnu við undbúning miðar vel, en núna erum við að stíga lokaskrefin í nauðsynlegum leyfisumsóknum, samningagerð, fjármögnun og öðrum undirbúningi. Það er mikill styrkur fyrir verkefnið að Landsvirkjun sé tilbúin að taka þetta skref með okkur. Við erum bjartsýn á framtíðina og leggjum áherslu á að starfsemi fyrirtækisins verði í góðri sátt við umhverfi og samfélag auk þess að framleiða hágæðavöru fyrir okkar viðskiptavini,“ segir Jens.
