Tinna Traustadóttir hefur verið ráðin framkvæmdastjóri nýs orkusölusviðs Landsvirkjunar og Ríkharð S. Ríkharðsson hefur verið ráðinn framkvæmdastjóri viðskiptaþróunar- og nýsköpunarsviðs. Bæði svið eru ný, en markaðs- og viðskiptaþróunarsvið Landsvirkjunar verður lagt niður samfara þessum breytingum.

"Orkusölusvið annist samningsgerð og rekstur orkusölusamninga við núverandi viðskiptavini Landsvirkjunar, með áherslu á að vinna náið með þeim viðskiptavinum, til að tryggja samkeppnishæfni þeirra. Þá eru fyrirsjáanlegar miklar breytingar á heildsölumarkaði fyrir raforku og markað fyrir kerfisþjónustu [...] Hlutverk Viðskiptaþróunar- og nýsköpunarsviðs er að þróa ný viðskiptatækifæri og stýra þátttöku Landsvirkjunar í orkutengdri nýsköpun. Á sviðið flytjast einnig þau verkefni Þróunarsviðs sem snúa að nýsköpun og fjölnýtingu. " segir í tilkynningu frá Landsvirkjun.

„Einn af hornsteinum í starfsemi Landsvirkjunar er samband fyrirtækisins við viðskiptavini sína og sameiginlegir hagsmunir að okkur takist vel til. Til framtíðar litið er mikilvægt að leita áfram leiða til þess að styðja við núverandi viðskiptavini. Og vera jafnframt í stakk búin að mæta þörfum nýrrar kynslóðar viðskiptavina sem og þeim breytingum sem eiga sér stað í starfsumhverfi fyrirtækisins,“  segir Tinna, sem starfaði hjá Actavis á árunum 2005 til 2014. Hún hefur starfað á viðskiptaþróunarsviði Landsvirkjunar frá árinu 2017.

„Það er mikil og spennandi áskorun að móta og innleiða nýja sýn á þróun orkumála á Íslandi næstu 10-20 árin í samræmi við nýlega kynnta Orkustefnu fyrir landið og vinna að því að raungera hana í samstarfi við fjölda öflugra samstarfsmanna, samherja og hagaðila, innan Landsvirkjunar sem utan. Landsvirkjun og endurnýjanlega orkulandið Ísland stendur frammi fyrir bæði áskorunum og miklum tækifærum og ég hlakka til að vinna að því með góðu fólki af krafti á næstu árum að auka fjölbreytni og jákvæð áhrif starfseminnar,“ segir Ríkarður Ríkarðsson, sem hóf störf á viðskiptaþróunarsviði Landsvirkjunar árið 2011 en hefur gegn starfi framkvæmdastjóra Landsvirkjun Power frá árinu 2017. Landsvirkjun Power veitir ráðgjöf og tekur þátt í þróun endurnýjanlegrar orkuvinnslu á erlendri grundu.