Landsvirkjun og Rio Tinto á Íslandi hafa samþykkt viðauka við raforkusamning fyrirtækjanna frá árinu 2010. Fram kemur í tilkynningu að samkomulagið renni styrkari stoðum undir samkeppnishæfni álversins í Straumsvík við áframhaldandi starfsemi þess.

„Landvirkjun og Rio Tinto fagna þessum áfanga, sem styrkir rekstrargrundvöll álversins á næstu árum. Þá tryggir samkomulagið fyrirsjáanlegt tekjustreymi Landsvirkjunar og aukinn sveigjanleika í viðskiptunum fyrir báða aðila. Eins og áður kveður samningurinn á um sölu á 390 MW eða 3.415 GWst á ári og gildir til ársins 2036,“ segir í fréttatilkynningu frá Landsvirkjun.

Raforkusamningurinn verður áfram bundinn Bandaríkjadal og tengdur bandarískri vísitölu neysluverðs (CPI), en grunnur hans breytist. Álverðstenging verður einnig tekin upp aftur í takmarkaðri mynd, þannig að raforkuverð til álversins taki að einhverju leyti tillit til aðstæðna á heimsmarkaði með ál.

Samhliða samkomulaginu hefur Rio Tinto ákveðið að draga til baka kvörtun sína til Samkeppniseftirlitsins frá því í júlí 2020 varðandi orkusölu til álversins í Straumsvík.

Samkomulagið er viðauki við gildandi samning frá 2010. Trúnaðarákvæði þess samnings eru enn í gildi og samningurinn verður því ekki opinberaður að svo stöddu, segir í tilkynningu.

„Við fögnum því að náðst hafi samkomulag um breytingar á orkusölusamningnum, eftir beiðni Rio Tinto þar um. Niðurstaðan er báðum aðilum í hag og um leið eykur hún skilvirkni raforkukerfisins á Íslandi. Markmið Landsvirkjunar er, líkt og áður, að tryggja fyrirsjáanlegar tekjur um leið og við tökum tillit til breytinga á alþjóðlegum mörkuðum og á þörfum viðskiptavina okkar,“ er haft eftir Herði Arnarsyni.

„Þetta eru ánægjuleg tíðindi sem eyða óvissu um starfsemina í Straumsvík, um leið og samkeppnishæfni okkar batnar. Við í Straumsvík getum öll verið ákaflega stolt af þeim árangri sem starfsfólk ISAL hefur náð undanfarin ár. Þrátt fyrir margra ára óvissu hefur öll starfsemin einkennst af fagmennsku og æðruleysi og missti starfsfólk ekki sjónar af því sem mestu máli skiptir. Öryggis- og umhverfismálin hafa verið í mjög góðum farvegi, framleiðslan gengið vel og gæði hennar mjög stöðug og mikil. Þótt þessum áfanga sé náð erum við ekki komin fyrir vind. Áfram eru krefjandi aðstæður í áliðnaði og verður ISAL áfram undir pressu að ná árangri. Með þessu samkomulagi um raforkumál getum við hins vegar einbeitt okkur að framleiða hágæða ál með þarfir viðskiptavina okkar í huga,“ segir Rannveig Rist, forstjóri Rio Tinto hér á landi.