Landsréttur staðfesti í dag niðurstöðu héraðsdóms í svokölluðu Glitnismáli, Orkuveitu Reykjavíkur í óhag. Deilt var um uppgjör afleiðusamninga frá því skömmu fyrir efnahagshrunið.

Í byrjun júlí 2020 dæmdi Héraðsdómur Reykjavíkur Orkuveitu Reykjavíkur í óhag og dæmdi félagið til að greiða þrotabúi Glitnis 747 milljónir króna auk dráttarvaxta vegna uppgjörs á fyrrnefndum afleiðusamningum. Málsins hefur verið getið í árshlutareikningum Orkuveitu Reykjavíkur og í níu mánaða uppgjöri, sem birt var mánudaginn 22. nóvember síðastliðinn, segir að miðað við stöðuna þann 31.12.2020 þá sé fjárhæðin með dráttarvöxtum 3.238 milljónir króna, að því er segir í tilkynningu til Kauphallarinnar.

Orkuveita Reykjavíkur er nú að fara yfir dóminn með tilliti til endanlegrar uppgjörsfjárhæðar og þess hvort leitað verði áfrýjunarleyfis Hæstaréttar Íslands.