Landnámsegg fást nú í Fjarðakaupum, Hagkaup, Krónunni, Melabúðinni og Verslun Hrísey.

„Við lækkum eggin núna þar sem við getum það með hagræðingu hjá okkur. Við erum samt sem áður mjög lítið eggjabú með aðeins 700 landnámshænur sem verpa ekki eins mikið og iðnaðarhænur gera. Okkur fannst bara gott að gera þetta núna þegar allt í samfélaginu er að hækka,“ segir Valgeir Magnússon, einn eigenda búsins Landnámsegg.

Gott í baksturinn

Búið er eingöngu skipað landnámshænum sem verpa ekki eins þétt og eru eggin örlítið minni en fólk á að venjast. Hænurnar fá fjölbreyttara fóður en iðnaðarhænur og ganga frjálsar. Meira bragð er af eggjunum sem eru ekki öll eins á litin.

„Þó að eggin séu aðeins minni þá hafa nokkrir góðir bakarar verið að gera tilraunir og allar uppskriftir ganga upp með sama eggjafjölda þegar fólk er að baka. Einnig hvet ég alla sem elska marens að prufa að gera marens úr landnámseggjum. Þá fær fólk marens eins og í gamladaga, mun þéttari og loftkenndari. Hann er bara alls ekki eins,“ bætir Valgeir við.