Eignarhaldsfélagið Rothschild & Co hefur greint frá því að næsti stjórnarformaður þess verði Alexandre de Rothschild, en hann tekur við af föður sínum David de Rothschild og verður þar með sá sjöundi í kynslóð fjölskyldu sinnar til að gegna starfinu.

Faðir Alexandre, sem lætur af störfum 75 ára að aldri, greindi frá stjórnarbreytingunum í yfirlýsingu í morgun en í kjölfarið hækkaði félagið um 3,7 prósent í kauphöllinni í París.

Félagið hefur undanfarin tvö ár aukið umsvif sín til muna og þá einkum í Bandaríkjunum. Opnaðar hafa verið skrifstofur í Chicago-borg og San Francisco og hafa fjölmargir reynsluboltar úr fjármálageiranum verið ráðnir þangað. 

Alexandre, sem hóf störf hjá fjölskyldufyrirtækinu fyrir áratug síðan, sagði í viðtali að hann hygðist halda áfram í útþenslu bankans í Bandaríkjunum þar sem rekstur hefur verið erfiður í sögulegu samhengi.

Hagnaður vegna fjármálaráðgjafar Rothschild & Co í fyrra nam 1,18 milljörðum evra, eða 145,6 milljörðum króna.