Kvika var umsvifamest í viðskiptum í Kauphöll Íslands á síðasta ári. Af 2.801 milljarða króna heildarviðskiptum á skuldabréfamarkaði í Kauphöll Íslands árið 2019 nam heildarvelta Kviku 537 milljörðum króna, eða 19,18 prósent af heildarviðskiptum ársins, segir í tilkynningu frá bankanum.

Kvika var með fimmtu mestu veltu á hlutabréfamarkaði árið 2019 en hún nam 165 milljörðum króna eða 13,65 prósent af heildarviðskiptum með hlutabréf, sem námu 1.206 milljörðum króna. Þá var Kvika með mesta veltu á Nasdaq First North á Íslandi en hún nam tæplega sex milljörðum króna eða um 33 prósent af heildarviðskiptum á First North markaðinum.