Síðustu vikur hafa 17 teymi kvenfrumkvöðla tekið þátt í viðskiptahraðlinum Women Innovators Incubator sem hefur verið samvinnuverkefni WomenTechIceland og Huawei. Hraðlinum var ætlað að styðja konur í því að ná frekari fótfestu í heimi tækninnar og að þróa hugmyndir sínar áfram.

„Markmið okkar er að hvetja konur til að vera virkir þátttakendur í tækniheiminum og styrkja þær til að nota tækni sem verkfæri til jákvæðra breytinga. Það gleður okkur mjög að með þessu náum við að sýna fram á hversu margar konur með frábærar hugmyndir eru að störfum í tæknisamfélaginu. Stundum þarf bara rétta stuðningskerfið til að koma verkefnum af stað með skipulegum hætti,“ segir Paula Gould, meðstofnandi WomenTechIceland.

Sumir þátttakenda eru reyndir frumkvöðlar á meðan aðrar litu jafnvel ekki á sig sem frumkvöðla áður en þær kynntust Women Innovators Incubator verkefninu.

Frumkvöðlarnir hafa hlotið bæði leiðsögn og ráðgjöf frá þekktum einstaklingum innan tæknisamfélagsins en kynningin markar lok Women Innovators Incubator viðskiptahraðalsins. Hann hófst 26. apríl og hefur staðið yfir nokkrar helgar með hóptímum og vinnustofum í húsnæði Öskju í Háskóla Íslands.

Teymin kynna verkefni sín fyrir sérvöldum hópi sérfræðinga í Hörpu þann 24. Maí næstkomandi frá klukkan 17:00 til 19:30 og verður jafnframt sýnt frá kynningunni í streymi. Vinningshugmyndin hlýtur þá eina milljón króna í verðlaun, auk þess sem veitt verða sérstök áhorfendaverðlaun.

„Við erum afskaplega stolt af þessum hópi frumkvöðla. Ég get ekki beðið eftir að sjá þær sigra salinn í Hörpu,“ segir Beatriz García, samskiptastjóri Huawei á Íslandi.

Streymi frá kynningunni: https://www.womentechiceland.com/live