Hlutafé fjártæknifyrirtækisins Kríta var aukið um 50 milljónir í lok síðasta árs og þar með tvöfaldað. Í fréttatilkynningu kemur fram að hlutafjáraukningin hafi verið gerð til að styðja við vöxt fyrirtækisins sem hefur verið um 60 prósent á milli mánaða frá því að Kríta hóf að markaðssetja fjármögnunarþjónustu snemma á síðasta ári.

,,Fjármögnunarstarfsemi Kríta hefur vaxið ört á milli mánaða frá því að fyrirtækið hóf að bjóða litlum og meðalstórum fyrirtækjum fjármögnunarþjónustu í maí á síðasta ári. Þar sem þessi vöxtur er meiri en reiknað var með var ákveðið að auka hlutafé í félaginu og þar með getu fyrirtækisins til að þjónusta fyrirtæki með fjármagn,” segir Sigurður Freyr Magnússon, forstjóri Kríta, sem starfar á fyrirtækjamarkaði.

„Markaðurinn þarf greinilega á fjármögnunarþjónustu að halda sem veitt er utan hins hefðbundna bankakerfis.“