Kristján Jóhannesson hefur verið ráðinn rekstrarstjóri hjá Gæðabakstri. Kristján mun bera ábyrgð á stjórnun, rekstri og áætlun framleiðslusviðs, auk vöruþróunar og átaksverkefna.

Kristján starfaði síðast hjá Icelandair þar sem hann bar ábyrgð á rekstri, þjónustu og söluvarningi um borð í vélum félagsins. Þar áður starfaði hann sem viðskiptastjóri í einkabankaþjónustu MP banka, forvera Kviku, og hjá Arion banka sem sölustjóri útibúa á viðskiptabankasviði og á eignastýringarsviði.

Kristján lauk BSc prófi í viðskiptafræði frá Háskólanum í Reykjavík árið 2009 og er að ljúka MSc gráðu í Business Management frá sama skóla.

Utan vinnu er Kristján virkur í íþróttastarfi tengdu sundi, en hann hefur æft og þjálfað sund í fjölmörg ár. Þá er hann í stjórn Sunddeildar KR.

Gæðabakstur framleiðir fjölmargar gerðir af brauðum, rúgbrauðum, flatkökum, kökum og fleiru fyrir matvöruverslanir, hótel, veitingastaði, mötuneyti, stofnanir og fyrirtæki.