Valdimar Hafsteinsson hefur starfað sem framkvæmdastjóri Kjöríss í aldarfjórðung. Valdimar segir að Kjörís sé eitt af fáum rótgrónum fjölskyldufyrirtækjum sem ekki voru seld í góðærinu og stóðu af sér hrunið.

Hver eru þín helstu áhugamál?

Helstu áhugamálin eru tengd hreyfingu og útivist. Ég var í öllum íþróttum sem í boði voru þegar ég var að alast upp. Knattspyrna náði yfirhöndinni tímabundið og lék ég í meistaraflokki með Hveragerði. Þegar undir þrítugt var komið þá stofnaði konan mín, ásamt fleirum, blakdeild í Hveragerði og fórum við nokkur að stunda blak af kappi. Sú íþrótt hentar vel fram eftir aldri og stundum við hjónin enn blak með Hamri á veturna. Á sumrin eru hlaupaskórnir dregnir fram og stundum við hlaup með félögum okkar í skokkhópi Hamars. Og er jafnvel keppt í einu og einu hlaupi til að halda æfingadampi. Að baki eru fimm maraþon og þrír Laugavegir sem eru helstu afrekin. Á veturna get ég líka alveg dottið í grúsk í ættfræði, landafræði eða sögu.

Hvernig er morgunrútínan þín?

Ég er einfaldur maður og rútínan er svipuð á virkum dögum. Hafragrautur með rjóma og banönum upp úr kl. 7.30. Svo er gengið í vinnuna sem eru nákvæmlega 112 skref. Þar er tekin staðan á verkefnum dagsins með samstarfsfólkinu. Á laugardagsmorgnum er skokktúr með skokkhópnum og að sjálfsögðu er sunnudagurinn hvíldardagur.

Hverjar eru helstu áskoranirnar í starfinu?

Það góða við þetta starf er að mér finnst það nánast alltaf skemmtilegt. Þegar maður hefur unnið í 25 ár í sama starfi þá er auðvitað krefjandi að halda sér og öðrum á tánum. Það að velja sér gott samstarfsfólk er lykilatriði og við höfum verið lánsöm að hafa afbragðs fólk í vinnu sem lítur á fyrirtækið sem sitt eigið. Það hefur auðveldað mér þennan rekstur á þessum árum. Auðvitað geta komið erfið mál og ákvarðanir sem geta tekið á en það eru tækifæri í öllum aðstæðum sem hægt er að nýta sér eða læra af. Aðrar áskoranir felast í að viðhalda stöðu okkar hjá neytendum og viðskiptavinum. Þeir hafa treyst okkur í 50 ár og borða ísinn okkar aftur og aftur. Að viðhalda þeirri hringrás er stærsta áskorunin.

Hverjar eru helstu áskoranirnar í rekstrarumhverfinu?

Það að reka framleiðslufyrirtæki á Íslandi er krefjandi starf. Undanfarin misseri hafa laun hækkað umtalsvert og samkeppni er allajafna hörð við innlendar og erlendar vörur. Verðhækkanir hafa því verið í lágmarki. Þetta gerir það að verkum að leita þarf allra leiða til hagræðingar og útsjónarsemi í rekstrinum. Á meðan eru vextir háir, tryggingagjald hátt og kostnaður eins og fasteignagjöld hefur stórhækkað. Tollar hafa lækkað á innfluttan ís og á meðan eru tollar hækkaðir á dýrustu hráefnunum til að girða fyrir ódýran innflutning. Þetta gerir allan rekstur í þessum iðnaði þungan. Umræða um sykurskatt er eins og áður felubúningur skattahækkana sem munu skekkja samkeppnisstöðu og veikja innlenda framleiðslu.

Hvaða breytingar sérðu fyrir þér hjá Kjörís á næstu árum?

Kjörís er eitt af fáum af þessum gömlu grónu fjölskyldufyrirtækjum sem voru ekki seld í góðærinu, stóðu af sér hrunið og hafa farið vel í gegnum kynslóðabreytingar. Ég sé Kjörís fyrir mér sem fjölskyldufyrirtæki í heilbrigðum rekstri sem byggður er á traustum grunni. Væntanlega mun umhverfið breytast með tækni og breyttum neysluvenjum en mikilvægast er að fylgjast vel með þróun og tileinka sér það sem það býður upp á hverju sinni. Við njótum þess að vera í Hveragerði þar sem framleiðslan byggir á jarðgufu, grænni orku og hreinu vatni. Aðstöðu sem við erum öfunduð af um allan heim.

Hvers konar stjórnunarhætti hefurðu tileinkað þér og hvers vegna?

Kjörís er 50 ára í ár og stofnað af föður mínum, Hafsteini Kristinssyni. Hann var frumkvöðull í mjólkuriðnaði og byrjaði með ostagerð 1966, á undan ísnum. Hann dó fyrir aldur fram 59 ára árið 1993 og tók systir mín, Guðrún, þá við stjórn í eitt ár áður en ég kom til starfa að fullu. Pabbi var leiðtogi og fékk fólk í lið með sér og innrætti okkur börnunum sínum þann hugsunarhátt. Við ólumst upp við að ganga í öll störf, m.a. keyra ísblöndu í Eden um helgar og gera það sem þurfti til að hlutir gengju. Mínir stjórnarhættir ganga út á að vera mannlegur og alltaf með opnar dyr fyrir alla. Ég reyni að hlusta á starfsfólk og viðskiptavini, lesa aðstæður og nýta það til að bæta okkur á öllum sviðum og með hæfilegu magni af Excel-skjölum.

Ef þú þyrftir velja allt annan starfsframa, hver yrði hann?

Þar sem helstu áhugamálin hafa verið í kringum íþróttir og útivist þá hef ég grun um að hugurinn gæti leitað þangað. Með öllum ferðamönnunum til Íslands þá gæti ég hæglega nýtt óeðlilega fróðleiksfýsn í landafræði og sögu í að miðla því til ferðamanna. Ég held ég gæti verið ansi góður leiðsögumaður.

Hvar sérðu þig eftir tíu ár?

Eftir 10 ár verð ég vonandi enn að borða ís, hvort sem ég verð í mínu starfi eða einhvers staðar á kantinum. Ég verð örugglega skokkandi um fjöllin og að njóta lífsins með fjölskyldu minni og vinum.

Helstu drættir

Nám:
Stúdent frá MA 1986, iðnaðartæknifræðingur (B.Sc.) frá gamla Tækniskólanum (nú HR).

Störf:
Ég hef starfað sem framkvæmdastjóri fjölskyldufyrirtækisins Kjöríss síðan 1994 og er formaður Atorku, félags atvinnurekenda á Suðurlandi. Áður vann ég með skóla aðallega í Kjörís og einnig í byggingavinnu.

Fjölskylduhagir:
Er kvæntur Sigrúnu Kristjánsdóttur, yfirljósmóður HSu. Eigum við tvíburana Hafstein og Kristján fædda 1989 og dótturina Guðbjörgu fædda 1996.