Samkvæmt nýbirtum kortaveltugögnum Seðlabankans nam velta innlendra greiðslukorta ríflega 82 milljörðum í febrúar síðastliðnum. Það samsvarar 13 prósenta aukningu frá sama mánuði í fyrra og um 4,5 prósenta aukningu frá sama mánuði árið 2020. Ef tekið er tillit til verðlags- og gengisbreytinga jókst kortavelta um 10,5 prósent á milli ára.

Líkt og síðustu mánuði mælist afar mikill munur á þróun kortaveltu innanlands og erlendis. Kortavelta innanlands jókst einungis um 0,5 prósent að raunvirði frá fyrra ári og hefur vöxturinn ekki mælst svo hægur síðan kortavelta tók að aukast á ný eftir samdrátt í upphafi faraldurs. Hins vegar jókst kortavelta erlendis um 93 prósent að raunvirði frá sama mánuði árið 2021, en þetta hefur verið þróunin uppi á síðkastið þar sem erlenda kortaveltan lagðist tímabundið nánast af í faraldrinum.

Ef febrúarmánuður er borinn saman við sama mánuð árið 2020, rétt áður en faraldurinn skall á, er raunvöxtur innlendrar kortaveltu 7 prósent og vöxtur erlendrar kortaveltu 4 prósent. Því má segja að kortaveltan bæði innanlands og erlendis hafi þegar náð fyrri hæðum og mælist nú enn meiri en fyrir faraldurinn.

Mun innrás Pútíns hafa áhrif á einkaneyslu?

Kortavelta gefur góða vísbendinga um þróun einkaneyslu, sem tekið hefur hressilega við sér eftir 3 prósenta samdrátt árið 2020. Til að mynda nam vöxtur einkaneyslu 7,6 prósentum á árinu 2021 samanborið við árið á undan og ef einkaneyslan er borin saman við árið 2019 nam vöxturinn 4,4 prósentum. Það má því segja að neysla landsmanna hafi náð sér að fullu eftir faraldurinn og gott betur.

Í kortaveltugögnum febrúarmánaðar er innrásar Rússa í Úkraínu ekki enn farið að gæta. Innrásin hófst þó ekki fyrr en 24. febrúar og því líklegra að áhrif stríðsins muni lita tölur næstu mánaða.

Hagfræðingar Íslandsbanka telja að stríðið gæti með óbeinum hætti haft áhrif á einkaneyslu hér í landi. Í gær birti Greining Íslandsbanka Korn um áhrif stríðsins á íslenskan efnahag þar sem fram kemur að einkaneysla muni að öllum líkindum vaxa eitthvað minna vegna stríðsins. Aukin innflutt verðbólga dregur úr kaupmætti heimilanna og líklegt sé að væntingar landsmanna muni dragast saman í næstu mælingum. Heimilin eigi það til að halda að sér höndum á óvissutímum og vitanlega velti þróun einkaneyslunnar á framgangi stríðsins á næstu vikum og mánuðum.