Kortavelta erlendra ferðamanna án flugsamgangna í ágúst nam 30,6 milljörðum króna og lækkaði um 2,4 prósent á milli ára. Velta í flokknum ýmis ferðaþjónusta, sem inniheldur afþreyingafyrirtæki, ferðaskipuleggjendur og ferðaskrifstofur dróst í ágúst saman um 13,1 prósent frá sama mánuði í fyrra eða um ríflega 600 milljónir króna.

Þetta kemur fram í frétt á vef rannsóknarsetur verslunarinnar sem birtir mánaðarlega tölur um greiðslukortaveltu erlendra ferðamanna.

Í stærsta einstaka flokknum, hótelgistingu, jókst kortaveltan um 1,8 prósent á milli ára í mánuðinum og kemur það í kjölfar 1,2 prósenta veltuvaxtar í júlí frá sama mánuði 2018. Veltuaukning í flokknum þrátt fyrir fækkun ferðamanna skýrist líklega af samspili lengri dvalartíma og gengislækkunar krónunnar, en gisting er gjarnan seld í erlendri mynt. Heildarvelta í hótelgistingu í ágúst nam rúmum 8,3 milljörðum króna.

Kortavelta í verslun jókst um 3,1 prósent á milli ára í ágúst. Mest varð aukningin í gjafa- og minjagripaverslun, 15,9 prósent en aðrir flokkar breyttust minna á milli ára. Kortavelta í dagvöruverslun dróst lítillega saman, eða um 0,6 prósent frá fyrra ári. Erlend kortavelta í verslun nam 4,9 milljörðum króna í ágúst.

Erlend kortavelta bílaleiga dróst saman um 7,7 prósent frá ágúst í fyrra og nam 2,9 milljörðum í mánuðinum. Þá dróst kortavelta veitingaþjónustu saman um 2,5 prósent á milli ára. 25,8 prósenta vöxtur varð í erlendri kortaveltu til menningar- afþreyingar og tómstundastarfsemi en sveiflur í flokknum eru algengar þar sem einstaka tónleikar eða viðburðir geta haft töluverð áhrif.