Pfaff og Sólheimar hafa undirritað fimm ára samstarfssamning um kolefnisjöfnun á rekstri Pfaff. Kolefnisbindingin mun fara fram með gróðursetningu trjáa í sérstökum skógræktarreit í landi Sólheima í Grímsnesi.

Fram kemur í tilkynningu frá Pfaff að Sólheimar muni skrá fjölda trjáa, staðsetningu þeirra og dagsetningu gróðursetningar, þannig að staðfesta megi kolefnisjöfnunina.

„Ég vil hvetja alla í rekstri að hefja þessa vegferð enda reyndist þetta ferli mun einfaldara en við reiknuðum með,“ er haft eftir Margréti Kristmannsdóttur, framkvæmdastjóra Pfaff.

Hún segir að Verkfræðistofan Efla hafi séð um útreikning á kolefnislosun Pfaff og reyndist hún vera hátt í 600 tré árlega.

„Við ákváðum að miða samninginn við 1.000 tré enda töldum við að móðir náttúra ætti eitthvað inni hjá rúmlega 90 ára gömlu fyrirtæki eins og Pfaff,“ er haft eftir Margréti í tilkynningunni sem kveðst mjög ánægð með samstarfið.

Sigurjón Örn Þórsson, stjórnarformaður Sólheima, segist vera ánægður með að njóta þess trausts að fá að kolefnisjafna reksturinn.

„Öll ræktun á Sólheimum er lífræn og vottuð auk þess sem samningur á borð við þann sem nú hefur verið undirritaður skapar mikilvæg störf fyrir fatlaða íbúa á Sólheimum,“ er haft eftir Sigurjóni í tilkynningu.