Niðurstaða stjórnarkjörs á hluthafafundi Símans var sú að Kolbeinn Árnason lögmaður, sem hafði ekki komist á lista tilnefningarnefndar, tekur sæti Hollendingsins Bertrands Kan. Jón Sigurðsson, stjórnarformaður Stoða sem er stærsti hluthafi Símans, kemur líka nýr inn.

Stjórn Símans skipa nú Bjarni Þorvarðarson, Helga Valfells, Jón, Kolbeinn og Sylvía Kristín Ólafsdóttir. Sex frambjóðendur sóttust eftir fimm stjórnarsætum.

Endurtaka þurfti stjórnarkjörið þar sem niðurstaðan var ekki í samræmi við samþykktir félagsins. Samkvæmt þeim skal hlutfall hvors kyns innan stjórnar ekki vera lægra en 40 próesnt. Náist ekki fullnægjandi hlutföll þarf að kjósa aftur. Valið stóð á milli þess að endurtaka kjörið á sama fundi eða halda annan fund eftir mánuð. Fyrri kosturinn varð fyrir valinu.

Samkvæmt heimildum Markaðarins var niðurstaða fyrsta stjórnarkjörsins sú að Jón Sigurðsson og Bjarni Þorvarðarson fengu flest atkvæði. Kolbeinn Árnason var í þriðja sæti, Bertrand Kan í fjórða sæti og Sylvía Kristín Ólafsdóttir í því fimmta. Fæst atkvæði fékk Helga Valfells og fékk hún ekki stjórnarsæti samkvæmt fyrsta kjöri.

Niðurstaðan eftir endurtöku stjórnarkjörsins var síðan sú að Helga fékk stjórnarsæti í stað Bertrands Kan. Var niðurstaðan þá í samræmi við samþykktir félagsins.