Eignarhaldsfélagið Kjálkanes, sem seldi fyrir skemmstu 15 prósenta hlut í Síldarvinnslunni fyrir 15 milljarða króna, hefur aukið verulega við eignarhlut sinn í Arion banka og er nú á meðal um 40 stærstu hluthafa bankans.

Kjálkanes heldur á um 0,3 prósenta hlut, samtals 5 milljónir hluta að nafnvirði, samkvæmt lista yfir alla hluthafa Arion, sem Markaðurinn hefur séð, en markaðsvirði þess hlutar er um 670 milljónir króna. Félagið bætti við sig 4 milljónum hluta að nafnvirði í lok síðasta mánaðar.

Eigið fé Kjálkaness, sem er í eigu sömu aðila og eiga útgerðarfélagið Gjögur á Grenivík, nam 13 milljörðum í árslok 2020. Stærstu eigendur Kjálkaness, með 45 prósenta hlut, eru systkinin Anna og Ingi Jóhann Guðmundsbörn en í hluthafahópnum er einnig Björgólfur Jóhannsson, fyrrverandi forstjóri Icelandair Group, með tæplega 9 prósenta hlut. Þrátt fyrir að hafa minnkað umtalsvert við hlut sinn í Síldarvinnslunni í hlutfjárútboði félagsins um miðjan síðasta mánuð er Kjálkanes enn næst stærsti hluthafinn með um 19,2 prósenta hlut.

Hlutabréfaverð Arion hefur hækkað um 41 prósent frá áramótum og stóð gengi bréfa bankans í 134,25 krónum á hlut við lokun markaða í gær.

Fréttin var uppfærð kl. 8:58.