EA og Höldur hafa keypt eignarhluti í hópferðabílafyrirtækinu SBA-Norðurleið á Akureyri af Gunnari M. Guðmundssyni framkvæmdastjóra og einum aðaleigenda félagsins. Kaupin fela í sér að KEA og Höldur eignast 5 prósenta eignarhlut hvort.

Þetta kemur fram í frétt á vef KEA. Þar segir að samhliða hafi verið undirritaðir valréttasamningar milli KEA og Gunnars um 15 prósenta eignarhlut í SBA-Norðurleið. 

SBA-Norðurleið er stærsta hópferðabílafyrirtæki utan höfuðborgarsvæðisins og er með um 80 bíla í rekstri og hjá félaginu eru um 85 heilsársstörf. 

Í fréttinni er haft eftir Gunnari að hann sé ánægður með að fá fjársterka aðila inn í eigendahóp félagsins. 

„Þrátt fyrir fækkun ferðamanna til landsins í ár sjáum við tækifæri á þessum markaði til lengri tíma litið.  Ég tel mikilvægt að efla félagið á yfirvegaðan máta í því umhverfi sem nú ríkir og hver veit nema tækifæri til vaxtar skapist í þessum aðstæðum.  Við viljum hafa félagið eigendalega sterkt og vel fjármagnað til að standa af okkur sveiflur á markaði og undirbyggja frekari eflingu félagsins  til lengri tíma,“ segir Gunnar.