Kínverski efnaframleiðandinn Jiangsu Sailboat Petrochemicals hefur undirritað samning við íslenska tæknifyrirtækið Carbon Recycling International (CRI) um byggingu verksmiðju til framleiðslu á metanóli með endurvinnslu koltvísýrings. Þetta kemur fram í tilkynningu.

Samningur um samstarfið verður undirritaður í dagf á fjarfundi milli Reykjavíkur og Peking, að viðstöddum Guðlaugi Þór Þórðarsyni utanríkisráðherra, Jin Zhijian, sendiherra Kína á Íslandi og Þóri Ibsen, sendiherra Íslands í Kína, auk fjölda gesta frá kínverskum stjórnvöldum og fyrirtækjum.

Heildarkostnaður við verkefnið er áætlaður um 35 milljónir bandaríkjadala, jafnvirði um 4,6 milljarða íslenskra króna.

Með búnaði CRI verða 150.000 tonn af koltvísýringi, sem fönguð eru úr efnaferli Jiangsu Sailboat, nýtt til að framleiða um 100.000 tonn af metanóli, en vetni til framleiðslunnar er fengið úr öðrum úrgangsstraumi verksmiðjunnar.

Koltvísýringurinn hefði ella verið losaður út í andrúmsloftið. Þetta magn koltvísýrings jafngildir allri losun virkjana á Íslandi, eða fjórðungs bíla á íslenskum heimilum. Þá dregur framleiðsla metanóls með aðferð CRI úr þörfinni fyrir metanól sem framleitt er úr kolum í Kína og stuðlar því að enn frekari samdrætti í losun.

Guðlaugi Þór Þórðarsyni utanríkisráðherra, Jin Zhijian, sendiherra Kína á Íslandi og Ingólfur Guðmundsson, forstjóri CRI.
Mynd/Atli Már Hafsteinsson

Verksmiðja Jiangsu Sailboat, sem staðsett er Shenghong, einum stærsta efnagarði heims, í borginni Lianyungang, í Jiangsu héraði fyrir norðan Shanghai, nýtir metanólið til að framleiða fjölbreyttar efnavörur sem meðal annars eru hráefni við framleiðslu á sólarhlöðum og plexigleri. Stefnt að því að framleiðsla með tækni CRI hefjist árið 2023.

Tækni CRI var hönnuð í rannsóknarstofu hér á landi og síðar þróuð og sannreynd í verksmiðju CRI í fullri stærði, við orkuverið í Svartsengi, sem gangsett var árið 2012.

Tæknin hefur vakið heimsathygli og hefur nýlega hlotið alþjóðleg verðlaun samtakanna Energy Globe og Nova stofnunarinnar, fyrir framlag til loftslagsmála.

Um er að ræða fjórða verkefni CRI utan landsteinanna og annað verkefnið í Kína, en fyrirtækið er senn að ljúka uppsetningu sambærilegrar verksmiðju í borginni Anyang, í Henan héraði.

„Við hjá CRI erum afar stolt af því að geta boðið samstarfsaðilum okkar þaulreynda tækni sem gerir strax áþreifanlegt gagn í baráttunni gegn loftslagsbreytingum. Með því að nýta þessa tækni í efnaframleiðslu getum við fyrr leyst jarðefnaeldsneyti af hólmi. Það sem áður fór til spillis verður að orku og hráefni. Þannig byggjum við upp öflugt en umhverfisvænna hagkerfi” sagði Ingólfur Guðmundsson, forstjóri CRI.