Katrín Olga Jóhannesdóttir, viðskiptafræðingur hefur verið kjörin ný í stjórn Kauphallarinnar Nasdaq Iceland. Þetta kemur fram í tilkynningu.

Katrín Olga hefur víðtæka og yfirgripsmikla reynslu úr viðskiptalífinu. Hún hefur gegnt stjórnunarstöðum innan fjölbreyttra fyrirtækja og atvinnugreina í gegnum tíðina, m.a. hjá Símanum og Já, og árið 2019 stofnaði hún ráðgjafarfyrirtækið Kría consulting ehf.

Katrín Olga situr nú í stjórn Landsnets, Haga og Eyrir Venture Management, en áður sat hún meðal annars í stjórn Icelandair Group og í bankaráði Seðlabankans. Þá á hún sæti í fjárfestingarráði Akurs framtakssjóðs og situr í háskólaráði Háskólans í Reykjavík.

Katrín Olga hefur gegnt ýmsum öðrum trúnaðarstörfum, m.a. formennsku í Viðskiptaráði Íslands á árunum 2016-2020, fyrst kvenna og varaformennsku í Samráðsvettvangi um aukna hagsæld á Íslandi.

Katrín Olga er með BS-gráðu í viðskiptum frá Háskóla Íslands og meistaragráðu í viðskiptum frá háskólanum í Óðinsvéum.