Ráðgjafafyrirtækið Athygli hefur ráðið Karen Kjartansdóttur til starfa. Karen hefur fjölbreytta starfsreynslu úr íslensku atvinnulífi en síðast starfaði hún sem framkvæmdastjóri Samfylkingarinnar þar sem hún hafði verið frá 2018. Þar á undan starfaði hún í fjölbreyttum verkefnum hjá ráðgjafastofunni Aton auk þess sem hún var samskiptastjóri Samtaka fyrirtækja í sjávarútvegi (SFS) á árunum 2013 til 2017. Þetta kemur fram í tilkynningu.

Karen hefur einnig talsverða reynslu af fjölmiðlastörfum, sem blaðamaður og pistlahöfundur á DV og á Fréttablaðinu og síðar fréttamaður og varafréttastjóri á Stöð 2. Einnig hefur Karen unnið fjölda trúnaðarstarfa fyrir félög í atvinnulífinu, meðal annars að því að efla tengsl milli atvinnulífs og menntastofnana auk þess að halda utan um skipulag á ráðstefnum og málþingum vegna málefna atvinnulífsins. Karen útskrifaðist með MBA gráðu frá Háskólanum í Reykjavík árið 2016 og er með BA gráðu í bókmenntafræði frá Háskóla Íslands. Hún hefur þegar hafið störf.

Athygli er eitt elsta ráðgjafarfyrirtæki á sviði samskipta og almannatengsla á Íslandi, stofnað árið 1989. Fyrirtækið veit­ir ráðgjöf og aðstoð við heildstæða miðlun skilaboða, stefnumótun, framsetningu og miðlun upplýsinga, fjölmiðlatengsl og -þjálfun, kynn­ingu og markaðssetn­ingu. Athygli vinn­ur fyr­ir fjöl­breytta flóru fyr­ir­tækja, fé­laga­sam­taka, op­in­berra aðila, sveit­ar­fé­laga og ein­stak­linga.