Jón Haukur Arnarson hefur verið ráðinn framkvæmdastjóri rekstrar við Háskólann í Reykjavík og mun hann hefja störf í byrjun árs 2023.

Jón Haukur hefur undanfarin sjö ár verið sviðsstjóri rekstrarsviðs hjá Matís ohf. Árin 2008 til 2015 var hann rekstrarstjóri, mannauðsstjóri og verkefnisstjóri hjá Matís. Áður fyrr var hann meðal annars yfirmaður rannsóknarstofu hjá Hilton Meats Retail Ltd. í Bretlandi, gæðastjóri hjá Coors Brewing Company í Colorado og sérfræðingur í bókhaldi hjá lífeyrisdeild Kaupþings.

Þar að auki var hann stjórnarmaður hjá Marinox ehf. 2013-2015 sem sérhæfir sig í framleiðslu lífvirkra efna úr þangi og hefur verið stjórnarmaður síðan 2015 hjá UNA skincare sem vinnur að framleiðslu snyrtivara með lífvirkum innihaldsefnum úr þangi.

Jón Haukur lauk BSc-gráðu í matvælafræði frá Háskóla Íslands árið 2000 og meistaragráðu í viðskiptafræði með áherslu á rekstrar- og gæðastjórnun frá HÍ og Colorado University at Boulder árið 2004 og lauk hann meðal annars GMP-stjórnendaþjálfun við Harvard Business School árið 2015.

Framkvæmdastjóri rekstrar situr í framkvæmdaráði HR, ásamt sviðsforsetum, deildarforsetum, fjármálastjóra, mannauðsstjóra, formönnum náms- og rannsóknaráða, formanni Stúdentafélags HR og rektor háskólans.