Jón Friðri Þorgrímsson hefur verið ráðinn framkvæmdastjóri Hlöllabáta ehf. sem reka samnefnda keðju ásamt veitingastaðnum Barion í Mosfellsbæ. Hann tekur við stöðunni af Sigmari Vilhjálmssyni.

Jón Friðrik er uppalinn á Húsavík en hefur síðustu ár búið og starfað bæði á Akureyri og Reykjavík. Hann er menntaður matreiðslumeistari og hefur undanfarin ár starfað sem stjórnandi í veitingaiðnaði. Jón Friðrik var veitingastjóri hjá Kea hótelum frá árinu 2013 til ársins 2020 eða þar til hann var ráðinn til Hlöllabáta, þar sem hann hefur síðustu mánuði gegnt starfi framkvæmdastjóra rekstrarsviðs.

Jón Friðrik segist vera mjög spenntur að taka við starfi framkvæmdastjóra hjá jafn öflugu fyrirtæki og samstæða Hlöllabáta er. Tímarnir séu krefjandi og lærdómsríkt hafi verið að standa í veitingarekstri. „Það er mikill hugur og samstaða í hópnum og hefur starfsfólkið staðið sig gífurlega vel og ætlum við okkur að stefna áfram veginn og reyna að gera enn betur.“