Jóhanna Margrét Gísladóttir hefur hafið störf sem framkvæmdastjóri þróunarsviðs Orkunnar, dótturfélags Skeljungs. Þetta kemur fram í tilkynningu.

Orkan rekur fjölorkustöðvar og verslanir undir merkjum Orkunnar, verslanir 10-11 og Extra. Auk þess tilheyra Löður, Lyfsalinn, Lyfjaval og Gló samstæðu Orkunnar. Þróunarsviði Orkunnar tilheyra markaðsmál, þjónusta, upplýsingatækni og stafræn þróun.

Jóhanna hefur síðan í mars stýrt markaðsmálum og ýmsum verkefnum á einstaklingssviði Skeljungs. Áður starfaði hún sem dagskrárstjóri Stöðvar 2 hjá Sýn og framkvæmdastjóri sjónvarpssviðs hjá 365 miðlum. Jóhanna er rekstrarverkfræðingur frá Duke háskóla í Bandaríkjunum.

„Við erum á vegferð að einfalda líf viðskiptavina okkar á 21. öldinni sem krefst mikillar samvinnu innan okkar félags, sem og við samstarfsaðila okkar. Við vildum því setja upplýsingatækni, markaðsmál og þjónustu á sama svið sem Jóhanna mun leiða inn á nýja tíma,“ segir Árni Pétur Jónsson, forstjóri Orkunnar.