Jóhann Tómas Guðmundsson hefur verið ráðinn til Sprotaþróunar Origo til þess að leiða sölu og þróun á Caren bílaleigulausninni.

Með Caren geta bílaleigur hámarkað flotanýtingu og haft umsjón með heildarferli rekstursins. Caren er mest notaða bílaleigukerfið á Íslandi. Þetta kemur fram í tilkynningu.

Jóhann starfaði áður að verðstýringu hjá bílaleigum eins og Avis, Budget og Bílaleigu Reykjavíkur. Þar áður starfaði Jóhann sem rekstrarstjóri sprotafyrirtækisins Ghostlamp. Þá hefur hann einnig unnið sem verkefnastjóri hjá Amazon í Þýskalandi að umbótarverkefni tengt bestun stærðar á pakkningum. Jóhann lauk MBA gráðu frá ESADE Business School í Barcelona og BSc. gráðu í rekstrarverkfræði frá Háskólanum í Reykjavík.

„Það er algjör draumur fyrir einstakling með reynslu úr sprotageiranum annars vegar og bílaleigubransanum hins vegar að vinna við Caren bílaleigulausnina. Caren er í rauninni 10 ára gamalt sprotafyrirtæki sem er þó mest notaða bílaleigukerfi landsins. Þá hafa margar íslenskar bíla- og húsbílaleigur starfað með okkur og veitt ómetanlega aðstoð í að þróa lausnina í þá átt sem hentar markaðinum. Við erum með ótrúlega öflugt teymi, en búum einnig svo vel að því að auðvelt er að sækja frekari sérfræðiaðstoð hjá starfsfólki Origo,“ segir Jóhann.