Íslandspóstur auglýsti allt hlutafé í prentsmiðjunni Samskipti til sölu í Fréttablaðinu í dag. Birgir Jónsson, forstjóri Íslandspósts, segir í tilkynningu að prentsmiðjurekstur sé ekki hluti af kjarnastarfsemi Íslandspósts og því hafi verið ákveðið að selja félagið.

„Íslandspóstur stendur á tímamótum og nauðsynlegt er að líta á alla hluta rekstrarins og endurmeta hvernig fyrirtækið á að vera byggt upp til framtíðar. Undanfarið hafa stjórnendur og stjórn félagsins unnið saman að gerð áætlunar til þess að umbreyta rekstrinum og hefur meðal annars verið gripið til víðtækra hagræðingaraðgerða og endurskipulagningar.

Salan á Samskiptum er hluti af þessu breytingaferli en okkar helstu markmið eru að stórbæta þjónustu til viðskiptavina, snúa rekstri Íslandspósts úr tapi í hagnað og einbeita okkur að kjarnastarfsemi fyrirtækisins,“ segir hann.

Deloitte annast söluferlið. Frestur til að skila inn óskuldbindandi tilboði er til klukkan 16:00 þann 10. október.