Ingibjörg Arnarsdóttir hefur verið ráðin í stöðu framkvæmdastjóra á nýju sameinuðu sviði fjármála og mannauðs hjá Isavia.

Ingibjörg hefur mikla stjórnunarreynslu á vettvangi fjármála og mannauðs. Nú síðast starfaði hún sem framkvæmdastjóri fjármála-, mannauðs- og verkefnastjórnar hjá Reiknistofu bankanna. Þar hafði hún m.a. yfirumsjón með fjármálum fyrirtækisins, mannauðsmálum og verkefnastýringu. Þetta kemur fram í tilkynningu frá Isavia.

Þar áður starfaði Ingibjörg í átta ár hjá Valitor, fyrst sem framkvæmdastjóri fjármálasviðs og síðar sem framkvæmdastjóri stjórnunar- og mannauðs.

Ingibjörg er með Cand. Oecon. gráðu í viðskiptafræði frá Háskóla Íslands með áherslu á endurskoðun og meistaragráðu í fjármálum frá Cass Business School/City University í London.

„Við hjá Isavia hlökkum til að fá Ingibjörgu til starfa,“ segir Sveinbjörn Indriðason, forstjóri Isavia. „Það er ljóst að þekking hennar og reynsla, nú síðast hjá Valitor og Reiknistofu bankanna, mun koma Isavia til góða í þeim verkefnum sem fram undan eru,“ segir í tilkynningu.

Ingibjörg tekur sæti í framkvæmdastjórn Isavia og hefur störf þann 1. desember næstkomandi.