Icelandair Group hefur ráðið Kviku banka, Íslandsbanka og Landsbankann sem ráðgjafa til þess að hefja skoðun á mögulegum leiðum til þess að styrkja enn frekar fjárhag félagsins. Stjórnendur flugfélagsins munu einnig vinna náið með íslenskum stjórnvöldum í því ferli. Þetta kemur fram í fréttatilkynningu frá Icelandair Group.

„Markmiðið er að styrkja samkeppnishæfni félagsins til framtíðar með því að stuðla að sterkri fjárhagsstöðu og lægri einingakostnaði hjá félaginu þegar kemur að því að sækja fram þegar sú ógn sem nú stafar af COVID-19 faraldrinum er liðin hjá.

Þetta mun tryggja að félagið komist sterkt í gegnum þessa krefjandi tíma, lágmarka áhrif á íslenska ferðaþjónustu og efnahag eins og mögulegt er, og gera félagið betur í stakk búið til að grípa þau framtíðartækifæri sem munu gefast,“ segir í tilkynningu félagsins.

Í tilkynningu Icelandair Group er rakið að sá heimsfaraldur sem nú geisi og þær ráðstafanir sem stjórnvöld hafi gripið til um allan heim til þess að sporna við útbreiðslu kórónaveirunnar hafi haft veruleg áhrif á flug og ferðalög.

Á síðustu dögum og vikum hafi áhersla verið lögð á það hjá Icelandair að halda uppi lágmarks flugsamgöngum til og frá landinu, bæði fyrir farþega og vöruflutninga þrátt fyrir að flugáætlun félagsins hafi dregist verulega saman á undanförnum vikum. Flugáætlun félagsins nemi nú minna en tíu prósentum af þeirri áætlun sem gefin hafði verið út fyrir þetta tímabil ársins.

„Enn ríkir mikil óvissa um hvenær ferðatakmörkunum verði aflétt og eftirspurn eftir flugi og ferðalögum muni aukast á ný og gera stjórnendur Icelandair Group ráð fyrir því að flugáætlun félagsins muni dragast saman um að minnsta kosti 25 prósent yfir sumartímann,“ segir í tilkynningu Icelandair Group.

Bogi Nils Bogason, forstjóri Icelandair Group.
Fréttablaðið/Stefán

Lausafjárstaða félagsins að meðtöldum óádregnum lánalínum er sögð enn vel yfir því viðmiði sem félagið starfar eftir en stefna þess hefur verið sú að þessi staða fari ekki undir 29 milljarða króna á núverandi gengi, jafnvirði um 200 milljóna Bandaríkjadala, á hverjum tíma.

„Eins og tilkynnt hefur verið um hefur félagið gripið til ýmissa aðgerða til þess að verja lausafjárstöðu sína á undanförnum vikum. Hins vegar, ef miðað er við lágmarkstekjuflæði hjá félaginu í apríl og maí, er ljóst að lausafjárstaða félagsins muni skerðast og fara undir ofangreint viðmið,“ segir í tilkynningunni.

Í ljósi þessarar stöðu, muni stjórnendur Icelandair Group leggja áherslu á að það á næstu vikum að styrkja fjárhagsstöðu félagsins til lengri tíma.

Haft er eftir Boga Nils Bogasyni, forstjóra Icelandair Group, í tilkynningunni, að öll flugfélög heims standi nú frammi fyrir því krefjandi verkefni að styrkja rekstrargrundvöll sinn til framtíðar.

„Við vitum að á einhverjum tímapunkti mun flug komast aftur í eðlilegt horf og því viljum við vera vel í stakk búin til að sækja fram og nýta þau tækifæri sem þá verða fyrir hendi. Til að ná þeirri stöðu er nauðsynlegt að gera viðeigandi breytingar á kostnaðaruppbyggingu félagsins, styrkja fjárhagsstöðu þess og leita allra leiða til að styrkja samkeppnishæfi þess til frambúðar,“ segir Bogi Nils.