Stjórn Icelandair Group hefur samþykkt, í kjölfar tilkynningar frá WOW air um slit viðræðna við Indigo Partners, að hefja viðræður við WOW air um aðkomu að rekstri félagsins. 

Segir í tilkynningu að ef að af verði muni aðkoma Icelandair byggja á sjónarmiði samkeppnisréttar um fyrirtæki á fallandi fæti. Viðræðurnar fara fram í samráði við stjórnvöld.

Tilkynnt var á heimasíðu WOW airá sama tíma að viðræðum við Indigo Partners hafi verið slitið og viðræður hafnar við Icelandair. Áætlað er að viðræðum verðu lokið fyrir 25. Mars á þessu ári, það er næsta mánudag. 

Í tilkynningu frá stjórnarráðinu segir að ríkisstjórnin vilji, vegna tilkynningar Icelandair, taka fram að þau hafi síðasta árið fylgst með erfiðleikum í alþjóðlegum flugrekstri og samkeppnisstöðu íslenskra flugfélaga.

„Eigendur Wow air hafa um nokkurra mánaða skeið leitað leiða til að tryggja rekstur félagsins og hafa átt viðræður við fjárfesta, flugrekendur og aðra haghafa. Hingað til hafa þær viðræður ekki skilað þeim árangri sem eigandi félagsins stefndi að,“ segir í tilkynningu stjórnarráðsins. 

Þar segir síðan að lokum að ríkisstjórnin muni áfram fylgjast „grannt með framvindunni“ og að þau bindi vonir við það að viðræður félaganna skili farsælli niðurstöður. 

Fréttin hefur verið uppfærð klukkan 21:31.