Icelandair hefur undirritað viljayfirlýsingu um kaup á fjórum Boeing 737 MAX flugvélum. Þetta var tilkynnt í kauphöll fyrr í dag. Í tilkynningu kemur fram að vélarnar eru framleiddar árið 2018 og gert er ráð fyrir að þær verði afhentar haustið 2022.

Með þessari viðbót verður félagið með átján 737 MAX vélar í rekstri.

„Það er ánægjulegt að halda áfram að fjölga Boeing 737 MAX vélum í flotanum okkar á góðum kjörum. Þær eru af nýrri kynslóð umhverfisvænni flugvéla og því mikilvægur þáttur í að draga úr kolefnislosun í starfsemi okkar. Við höfum aukið starfsemina jafnt og þétt eftir heimsfaraldurinn og höldum nú úti mjög öflugu leiðakerfi sem tengir Evrópu og Norður-Ameríku í gegnum Ísland,“ segir Bogi Nils Bogason, forstjóri Icelandair, í tilkynningu.

Hann bætir því við að í sumar muni félagið fljúga beinu flugi til 44 áfangastaða erlendis, allt að fimm sinnum á dag.