Sprotafyrirtækið HorseDay hefur lokið 100 milljón króna hlutafjáraukningu sem leidd var af Nýsköpunarsjóði með þátttöku nokkurra einkafjárfesta. Fyrirtækið mun í framhaldinu setja aukinn kraft í vöruþróun og markaðssetningu á smáforriti þeirra.

HorseDay var stofnað árið 2020 og vinnur að gerð smáforrits sem er sérsniðið að þörfum hestafólks. Forritið býður upp á fjölbreytta möguleika sem auðveldar fólki utanumhald og markmiðssetningu í tengslum við þjálfun, umhirðu og öllu því sem við kemur hestahaldi.

HorseDay ætlar sér í fyrstu að ná til hestaáhugamanna á Íslandi og erlendis, en í framhaldinu verður þróun smáforritsins skoðuð fyrir önnur hestakyn. Það er einnig fyrirliggjandi að teymið muni stækka á næstunni, en í dag starfa sex starfsmenn hjá fyrirtækinu.

„HorseDay er nú þegar notað víða um heim en um 800 manns nota smáforritið vikulega."

Oddur Ólafsson, framkvæmdastjóri og stofnandi HorseDay, segir aðkomu Nýsköpunarsjóðs og annarra fjárfesta gríðarlega mikilvæga á þessum tímapunkti. HorseDay hefur þegar hlotið styrki úr Tækniþróunarsjóði Rannís, Uppbyggingarsjóði Suðurlands og frá Stofnverndarsjóði íslenska hestsins.

„Við erum stolt af þeim árangri sem við höfum náð hingað til erum spennt fyrir því að geta sett enn meiri kraft í vöruþróun og útbreiðslu HorseDay á næstu mánuðum. HorseDay er nú þegar notað víða um heim en um 800 manns nota smáforritið vikulega,“ segir Oddur.

Hrönn Greipsdóttir, framkvæmdastjóri Nýsköpunarsjóðs, segir að HorseDay sé að þróa forrit sem býður upp á möguleika sem ekki hafa áður sést meðal þeirra sem stunda hestamennsku.

„Við fyrstu sýn gæti virst sem hópur notenda væri þröngur en sú er ekki raunin því samfélagið utan um íslenska hestinn telur líklega yfir 300 þúsund manns víðs vegar um heiminn. Þá er einnig hægt að heimfæra forritið upp á aðrar hestategundir í framtíðinni. Hestamennskan er bæði holl hreyfing og umhverfisvæn og við erum spennt fyrir því að nú sé verið að færa hana inn í stafrænt umhverfi. Fjárfestingin fylgir stefnu Nýsköpunarsjóðs sem er að koma snemma inn í verkefni og draga með sér einkafjárfesta eins og í tilviki HorseDay,” segir Hrönn.