Ríflega þriðjungur íbúðastofnsins er í eigu einstaklinga eða lögaðila sem eiga fleiri en eina íbúð og hefur hlutfallið haldist nær stöðugt síðusutu ár. Þetta er meðal þess sem kemur fram í Hagsjá Landsbankans. Ekki er að sjá að lægri vextir hafi aukið áhuga fólks á að fjárfesta í fleiri en einni íbúð.

Hlutfall íbúða í eigu aðila sem eiga fleiri en eina íbúð hefur haldist stöðugt síðustu ár.

„Það er því ekki að sjá að mikil eftirspurn síðustu mánaða sé vegna einstaklinga eða lögaðila sem eru að kaupa sína aðra eða þriðju íbúð. Þvert á móti hafa fyrstu kaupendur orðið fyrirferðameiri og þar með hefur hlutfall íbúða í eigu aðila sem eiga eina fasteign aukist lítillega á sama tíma og hlutfall þeirra sem eiga fleiri en eina íbúð hefur lækkað," segir í Hagsjánni.

Um síðustu aldamót var um 25 prósent af íbúðastofni landsins í eigu einstaklinga eða lögaðila sem áttu fleiri en eina íbúð. Árið 2012 var hlutfalið komið upp í 35 prósent og hefur í raun haldist óbreytt síðan þá. Nú stendur hlutfallið í 35,1 prósenti en það fór hæst upp í 35,9 prósent árið 2017.

Samkvæmt nýjustu upplýsingum Þjóðskrár bættust um 3.700 íbúðir við íbúðastofn landsins í fyrra sem er mesti fjöldi frá 2007.

„Íbúðum í eigu einstaklinga sem eiga eina íbúð fjölgaði um tæplega 2.800 og íbúðum í eigu þeirra sem eiga fleiri en eina íbúð fjölgaði um 960. Síðustu ár hefur fjölgun íbúða í eigu aðila sem eiga einungis eina íbúð verið meiri en á meðal þeirra sem eiga fleiri íbúðir," segir í Hagsjánni.