Hluta­bóta­leið rík­is­stjórn­ar­inn­ar verður fram­lengd með óbreytt­um hætti og gildir nú til og með 31.maí á þessu ári.

Þá munu atvinnuleitendur fá greidd 6 prósent af grunnatvinnuleysisbótum með hverju barni til og með 31. desember á þessu ári en áður gilti úrræðið til 31. desember 2020.

Áætlaður heildarkostnaður ríkissjóðs vegna breytinganna er 6,7 milljarðar króna. Þar af fara 6 milljarðar króna í framlengingu á hlutabótaleiðinni og 700 milljónir króna í framlengingu á hækkun á greiðslum til atvinnuleitenda vegna barna.

„Við sjáum vonandi fljótlega fyrir endann á því óvissuástandi sem hefur ríkt undanfarna mánuði vegna Covid-19 faraldursins. Það mun hins vegar taka einhvern tíma að komast algjörlega fyrir vind og við getum gert ráð fyrir því að ýmsar takmarkanir muni áfram vera viðvarandi eitthvað fram á árið. Úrræðið hefur nýst mjög vel en það eru mikil verðmæti fólgin í því að sem flestir haldi virku ráðningarsambandi við vinnuveitanda og að hér verði kröftug viðspyrna þegar faraldurinn hefur gengið yfir,” segir Ásmundur Einar Daðason, félags-og barnamálaráðherra í tilkynningu frá félagsmálaráðuneytinu.