Birtingahúsið hefur ráðið til sín Ólaf Jónsson sem mun sinna ráðgjöf og þróunarvinnu í tengslum við netmarkaðsmál fyrir viðskiptavini félagsins. Ólafur, eða Óli Jóns, eins og hann er oftast kallaður, hefur um langt skeið unnið við ráðgjöf og kennslu á sviði netmarkaðsmála. Auk þess hefur hann síðustu árin haldið úti vinsælu hlaðvarpi um markaðsmál og viðskiptalíf sem mun halda áfram í hans umsjá. Þetta kemur fram í tilkynningu.

Óli var á árum áður meðal annars ráðgjafi hjá Netráðgjöf og Reykjavík Excursions áður en hann fór út í eigin rekstur.

„Við erum mjög lukkuleg með að hafa fengið Óla til liðs við okkur. Hann er öflugur og mjög reynslumikill markaðsmaður sem verður skemmtileg viðbót í okkar liðsheild. Framundan eru áhugaverð verkefni og nýjungar sem verður gaman að fá að kynna fyrir okkar samstarfsaðilum og markaðnum,“ segir Hugi Sævarsson, framkvæmdastjóri Birtingahússins.

„Það er virkilega spennandi að vera kominn í þetta umhverfi sem Birtingahúsið starfar í. Fyrirtæki sem ég hef fylgst vel með í gegnum tíðina og verið leiðandi á sínu sviði. Félagið vinnur með metnaðarfullum og framsæknum viðskiptavinum og það verður gaman að fá að kynnast þeim og leggja mitt af mörkum,“ segir Ólafur.

Birtingahúsið var stofnað árið 2000 og veitir faglega og óháða ráðgjöf um auglýsingabirtingar, markaðssetningu og uppbyggingu auglýsingaherferða.

Félagið er í alþjóðlegu samstarfi við Dentsu Aegis Network, sem hefur yfir að ráða einu allra stærsta og öflugasta neti markaðs- og birtingaráðgjafar í heiminum, með starfsemi í yfir 140 mörkuðum. Meðal dótturfélaga DAN eru Carat, Vizeum og iProspect.