1. sæti
Samkvæmt dómnefnd Markaðarins, sem er skipuð forstjórum og sérfræðingum úr viðskiptalífinu, sýndi Orri Hauksson, viðskiptamaður ársins, fádæma seiglu þegar á móti blés og allt leit út fyrir að risasala á innviðafyrirtækinu Mílu væri að renna út í sandinn.
Samkeppniseftirlitið gerði talsverða fyrirvara við söluna sem gerði það að verkum að um tíma leit út fyrir að viðskiptin væru að ganga til baka.
„Afrek að ná svo góðum samningi og þrautseigja að koma sölunni í gegnum kerfið og leiða hana til lykta þrátt fyrir þunglamaleg og tímafrek afskipti Samkeppniseftirlitsins. Allt ferlið tók óeðlilega langan tíma. Orri leiddi starf þess hóps sem vann að málinu á vegum Símans með miklum myndarbrag, sem sýnir hversu öflugur stjórnandi hann er,“ segir í rökstuðningi dómnefndar Markaðarins.
Heildarandvirði sölunnar á Mílu til Ardian var 69,5 milljarðar þegar upp var staðið og samþykki Samkeppniseftirlitsins lá fyrir. Það var 3,5 milljörðum lægri upphæð en kveðið var á um í upphaflegum sölusamningi.
Orri hefur setið í forstjórastólnum hjá Símanum samfleytt í níu ár en á þeim tíma hefur fyrirtækið gengið í gegnum talsverðar breytingar. Skerpt hefur verið á þjónustuhlutverki fyrirtækisins og verkefnum fækkað.
Einn af þeim sem skipa dómnefnd Markaðarins segir mikið hafa mætt á stjórnendum Símans á árinu. „Orri stóð þá vakt með stakri prýði. Hélt hárrétt á spöðunum og náði góðum samningum fyrir hluthafa Símans með tímamótasölu á dótturfyrirtækinu Mílu við afar krefjandi aðstæður.“
„Við svipaðar aðstæður hefðu margir eflaust játað sig sigraða."
Margir sem sátu í dómnefnd Markaðarins nefndu þrautseigju Orra á þessum krefjandi tímum. Hún hafi umfram annað riðið baggamuninn þegar öll sund virtust lokuð og franski kaupandinn farinn að ókyrrast.
„Við svipaðar aðstæður hefðu margir eflaust játað sig sigraða. Sérstaklega í ljósi þess óróa sem var farinn að gera vart við sig á mörkuðum um svipað leyti.“
Sjálfur segist Orri líta stoltur til baka þegar árið er gert upp. Hann segir allt starfsfólk og stjórn Símans deila viðurkenningu dómnefndar Markaðarins með honum. „Þau stóðu sig öll eins og hetjur á krefjandi tímum. Hópurinn stóð þétt saman og landaði samningum á elleftu stundu. Við snúnar aðstæður,“ segir Orri Hauksson, viðskiptamaður ársins að mati dómnefndar Markaðarins.
2. sæti
Útsjónarsamur stjórnandi
Gunnþór Ingvason, framkvæmdastjóri Síldarvinnslunnar, náði eftirtektarverðum árangri í íslensku viðskiptalífi á árinu. Hann hafnaði í öðru sæti í vali dómnefndar Markaðarins á viðskiptamanni ársins.
„Kaup Síldarvinnslunnar á útgerðarfyrirtæki Vísis í Grindavík eru risastór og söguleg."
„Eftir afar farsæla skráningu í Kauphöll Íslands á síðasta ári hefur Gunnþór staðið í stórræðum. Kaup Síldarvinnslunnar á útgerðarfyrirtæki Vísis í Grindavík eru risastór og söguleg. Samkeppniseftirlitið hefur nú heimilað 31 milljarðs króna viðskiptin og Vísir er orðinn hluti af samstæðu Síldarvinnslunnar. Eftir stendur gríðarlega sterkt félag, stýrt af öflugum forstjóra,“ segir í rökstuðningi eins af álitsgjöfum Markaðarins.
Gunnþór og Síldarvinnslan bættu svo um betur með kaupum á liðlega 34 prósenta hlut í laxeldisfyrirtækinu Arctic Fish fyrir tæplega 14 milljarða. Hluthafar Síldarvinnslunnar geta vel við unað með ávöxtun hlutabréfa, ólíkt mörgum í kauphöllinni í dag. Félagið hefur enda hækkað einna mest allra skráðra fyrirtækja á árinu.
Það er jafnframt samdóma álit dómnefndar að Gunnþór hafi sýnt, svo ekki verður um villst, að hann hafi yfirburðaþekkingu á íslenskum sjávarútvegi og sé afar útsjónarsamur.
3. sæti
Aðdáunarverður árangur og sala
Helgi Hermannsson seldi nýsköpunarfyrirtækið Sling til bandaríska tæknifyrirtækisins Toast fyrir 8,6 milljarða á árinu. Hann hafnaði í þriðja sæti í vali dómnefndar Markaðarins á viðskiptamanni ársins.
Helgi stofnaði Sling fyrir rúmum sjö árum og er það samdóma álit dómnefndar að hann hafi átt öskubuskuævintýri ársins í íslensku viðskiptalífi.
Hugmynd að baki Sling er hugbúnaður fyrir vinnustaði þar sem unnið er á vöktum.
„Ótrúlega flott uppbygging og enn flottari sala."
„Ótrúlega flott uppbygging og enn flottari sala. Að fara á sjö árum úr því að labba á milli mögulegra viðskiptavina í Bandaríkjunum með PowerPoint-skjal yfir í að selja fyrirtækið á yfir 8 milljarða er ekkert minna en afrek.“
Toast tilkynnti um kaupin á sumarmánuðum og bætti þar með Sling við lausnir fyrirtækisins á sviði launavinnslu og teymisstjórnunar. Toast-hugbúnaður er nýttur af veitingastöðum um allan heim.
Helgi er langstærsti hluthafinn í Sling og stofnandi. Samkvæmt honum eru spennandi tímar fram undan eftir þetta risastóra skref á árinu. Ævintýrið sé rétt að byrja.
Dómnefnd Markaðarins telur nær öruggt að meira eigi eftir að heyrast af sigrum Helga Hermannssonar og Sling á næstu árum.
Þau sem einnig voru tilnefnd
Gerður Huld Arinbjarnardóttir eigandi Blush
„Gerður hefur margfaldað rekstrartekjur Blush og vakið verðskuldaða athygli fyrir snilldarlega útfærða markaðssetningu. Magnaður frumkvöðull sem hikar ekki við að fara ótroðnar slóðir.“
Ásta Fjeldsted forstjóri Festi
Ásta er ferskur andblær í hópi stjórnenda íslenskra fyrirtækja. Óvenjuleg, kraftmikil og jákvæð. Lægði öldur innan Festi eftir ólgu í kringum brotthvarf fyrrverandi forstjóra.“
Guðmundur F. Sigurjónsson stofnandi og forstjóri Kerecis
„Guðmundur stýrir spennandi fyrirtæki á alþjóðamarkaði. Kerecis fékk mikla viðurkenningu á árinu þegar erlendir fagfjárfestar komu inn í félagið og Kerecis vex jafnt og þétt.“
Gísli Herjólfsson stofnandi Controlant
„Gísli heldur áfram að byggja á góðum grunni og treysta rekstur á einu arðbærasta félagi landsins. Ekki sjálfgefið að halda svo vel á spöðunum eftir ævintýralegan vöxt síðustu ára.“
