Norska félagið Helitrans AS hefur keypt allt hlutafé í Þyrluþjónustunni ehf. sem á bæði Helo og Reykjavík Helicopters. Seljandi er Narro ehf. en kaupverðið hefur ekki verið opinberað.
Helitrans AS var stofnað árið 1990 og er eitt stærsta þyrlufyrirtæki á Norðurlöndum. Félagið rekur 26 þyrlur á 15 mismunandi stöðum í Noregi og rekur jafnframt flug- og þyrluskóla í Svíþjóð. Aðalskrifstofur félagsins eru staðsettar á Værnes flugvellinum í Þrándheimi.
”Helitrans hefur góða þekkingu á íslenska markaðnum eftir gott samtarf undanfarin ár við Þyrluþjónustuna. Ég sé líka mikil vaxtatækifæri á íslenska þyrlumarkaðnum þar sem Ísland er vinsæll áfangastaður fyrir ferðamenn. Margir hafa sett Ísland á ”bucket listann” sinn enda býður Ísland upp á stórfenglega náttúru. Ég er jafnframt spenntur fyrir því að geta boðið íslenskum fyrirtækjum upp á verkflug enda eru okkar flugmenn með mikla reynslu af því að fljúga með þungan farm og í lagningu á rafstrengjum í Noregi,” segir Ole Christian Melhus, forstjóri Helitrans AS.
Fjölvar Darri Rafnsson, stjórnarformaður Þyrluþjónustunnar, segir kaup Helitrans á fyrirtækinu vera stórt skref inn í framtíðina fyrir bæði starfsfólk og viðskiptavini. “Helo og Reykjavík Helicopters eru þekkt vörumerki á Íslandi og ætlar Helitrans að efla starfsemina þeirra enn frekar. Síðustu árin hafa verið spennandi en jafnframt krefjandi í rekstri og er ég þakklátur okkar frábæra starfsfólki og viðskiptavinum.”
