Í tilkynningu frá Heklu segir að kórónuveirufaraldurinn hafi haft gríðarleg áhrif á alla framleiðslu í heiminum og bílaframleiðsla sé þar engin undantekning. Miklar tafir hafi orðið á framleiðslu vegna skorts á íhlutum sem hafi valdið því að bílar hafa komið seinna til landsins en áætlað var.

Þessar seinkanir hafi orðið til þess að því miður hafi ekki allir, sem vildu, getað nýtt sér ávinninginn sem fólst í því að enginn virðisaukaskattur var á tengiltvinnbílum (PHEV) fram til áramóta. Þegar virðisaukaskatturinn bættist við hafi þessir bílar hækkað í verði um 480 þúsundkrónur.

Hekla hefur nú náð samningum við Mitsubishi Motors sem gerir kleift að fella niður andvirði virðisaukaskattsins sem lagður var á tengiltvinnbíla 1. janúar 2022 og bjóða takmarkaðan fjölda bíla á 2021 verðinu. Í tilkynningunni segir að með þessu vilji Hekla og Mitsubishi Motors koma til móts við þá sem ekki náðu að nýta sér ávinninginn af aðgerðum stjórnvalda vegna tafa á framleiðslu. „Við erum ótrúlega ánægð með það að hversu vel Mitsubishi tók í þessa óvenjulegu bón okkar og því að geta haldið áfram að styðja við breytingu bílaflotans á Íslandi yfir í vistvæna samgöngumáta,“ segir Friðbert Friðbertsson forstjóri Heklu.

„Að sjálfsögðu verður öllum sköttum og gjöldum gerð full skil en samningurinn gerir okkur kleift að taka þessa 480 þúsund króna hækkun á okkur svo viðskiptavinurinn nýtur góðs af því. Við trúum því að þetta sé góð leið til að koma til móts við fólk í bílahugleiðingum sem vill velja rafmagn en treystir sér ekki í að taka skrefið til fulls,” segir Friðbert og bætir við að hægt sé að fá afhenta fjórhjóladrifna vel búna Mitsubishi Eclipse Cross PHEV á einungis örfáum dögum.