HB Grandi hefur selt ferskfisktogarann Engey RE 1 til fyrirtækisins Murmansk Trawl Fleet í Rússlandi og verður togarinn afhentur nýjum eigendum í fyrri hluta júnímánaðar, eftir því sem fram kemur í tilkynningu sem sjávarútvegsfélagið sendi Kauphöllinni skömmu fyrir hádegi.

Í tengslum við söluna verður ísfisktogarinn Helga María AK 16 tekinn aftur í rekstur en togaranum var lagt í febrúar síðastliðnum.

Skipverjum í áhöfn Engeyjar verður boðið pláss á öðrum skipum félagsins, að því er segir í tilkynningunni.

Engey er ferskfisktogari sem var smíðaður í Tyrklandi 2017 og hefur verið gerð út af HB Granda frá því skipið kom til landsins.