Stjórn HB Granda hefur samþykkt að hefja viðræður við Útgerðarfélag Reykjavíkur um kaup á sölufélögum síðarnefnda félagsins í Japan, Hong Kong og á meginlandi Kína sem og þjónustufélagi á Íslandi sem tengist framangreindum félögum. Tilgangurinn er að styrkja sölu- og markaðsstarf félagsins.

Frá þessu er greint í tilkynningu sem HB Grandi sendi Kauphöllinni fyrr í dag.

Þar segir auk þess að nánar verði gerð grein fyrir efni fyrirhugaðra viðskipta nái félögin saman um kaupsamning. Er stefnt að því að niðurstöður viðræðna liggi fyrir ekki síðar en við lok þriðja ársfjórðungs.