Páll Gíslason, sem hefur víðtæka reynslu af hátíðniviðskiptum á erlendri grundu, er líklegur til að taka sæti í stjórn Sýnar á næsta aðalfundi félagsins. Hann komst á lista tilnefningarnefndar Sýnar og tæki sæti Hilmars Þórs Kristinssonar, sem gefur ekki kost á sér til áframhaldandi stjórnarsetu.

Páll Gíslason er fæddur árið 1976. Hann er rafmagns- og tölvuverkfræðingur sem hefur á rúmlega tuttugu ára ferli starfað við nýsköpun á ýmsum sviðum tækni og vísinda.

Undanfarin fjórtán ár hefur Páll stofnað og leitt tvö fyrirtæki í hátíðniviðskiptum (e. High Frequency Trading) með starfsemi í Bandaríkjunum, Bretlandi, Þýskalandi og Ástralíu. Annars vegar World Financial Desk LLC, sem var stofnað í Los Angeles 2007 og selt til Crabel Capital Management 2015, og hins vegar Keilir Partners ehf. sem hóf starfsemi 2018, og Páll rekur í dag. Páll starfaði hjá Crabel frá 2015 til ársloka 2017.

Páll er með M.Sc. gráðu í rafmagns- og tölvuverkfræði frá University of Southern California og B.Sc. í rafmagns- og tölvuverkfræði frá Háskóla Íslands. Áður en Páll snéri sér að fjármálamörkuðum hafði hann starfað fyrir þrjú sprotafyrirtæki. Hann þróaði algrím fyrir hljóðkerfi hjá Audyssey Labs í Los Angeles, að loknu framhaldsnámi, en þar áður starfaði hann við fjarskiptakerfi hjá Íslandssíma og hjá Petromodel við þróun tækis til að greina og flokka möl.

Tilnefningarnefndin leggur til að stjórn Sýnar verði að öðru leyti óbreytt. Aðrir stjórnarmenn eru Hjörleifur Pálsson formaður, Petrea Ingileif Guðmundsdóttir, Sigríður Vala Halldórsdóttir og Tanya Zharov.