Hagstofan reiknar með því að landsframleiðsla dragist saman um 7,6 prósent í ár sem yrði einn mesti samdráttur á síðustu 100 árum. Áhrif Covid-19 á hagkerfið hafa verið víðtæk. Ferðaþjónusta hefur nánast lamast og atvinnuleysi aukist til muna. Þetta kemur fram í tilkynningu.

Í þjóðhagsspá er ráð fyrir bata á næsta ári og að landsframleiðsla aukist um 3,9 prósent á milli ára. Áætlað er að þjóðarútgjöld dragist saman um 3,6 prósent í ár en að viðsnúningur verði á næsta ári og þau aukist um 3,9 prósent.

Gert er ráð fyrir að einkaneysla dragist saman um 5 prósent í ár og að atvinnuleysi verði að jafnaði 7,8 prósent. Á næsta ári er spáð 4,2 prósenta aukningu einkaneyslu og að atvinnuleysi verði 6,8 prósent. Útlit er fyrir að útflutningur dragist saman um 30 prósent í ár en búist er við bata á næsta ári og rúmlega 17 prósent vexti.