Hagnaður Nova nam tæplega 1,2 milljörðum króna á síðasta ári, samkvæmt nýbirtum ársreikningi fjarskiptafélagsins, og dróst saman um nítján prósent frá fyrra ári þegar hann var um 1,5 milljarðar króna.

Tekjur Nova, sem er með um þriðjungshlutdeild á íslenskum farsímamarkaði, voru tæpir 9,9 milljarðar króna í fyrra og jukust um liðlega tólf prósent frá árinu 2017 en þá námu þær 8,8 milljörðum króna.

EBITDA fjarskiptafélagsins - afkoma fyrir afskriftir, fjármagnsliði og skatta - var jákvæð um 2,3 milljarða króna á síðasta ári, að því er fram kemur í ársreikningnum, en til samanburðar var hún jákvæð um tæplega 2,5 milljarða króna árið áður.

Eigið fé Nova var bókfært á 4.287 milljónir króna í lok síðasta árs og var eiginfjárhlutfallið á sama tíma 67 prósent.

Stjórn fjarskiptafélagsins leggur til að greiddur verði arður upp á 750 milljónir króna til móðurfélagsins Platinum Nova en það félag er í jafnri eigu bandaríska eignastýringarfyrirtækisins Pt Capital annars vegar og Novators, fjárfestingafélags Björgólfs Thors Björgólfssonar, og stjórnenda Nova hins vegar.