Viðskipti

Hagar tekjufærðu hluta endurgreiðslunnar frá ríkinu

Fréttablaðið/Anton Brink

Hluti af þeim 157 milljónum króna, auk dráttarvaxta, sem ríkið var í nóvember í fyrra dæmt til þess að endurgreiða Högum vegna ólögmætrar gjaldtöku þess af innfluttum landbúnaðarvörum var tekjufærður á síðasta rekstrarfjórðungi smásölurisans sem lauk í febrúar.

Finnur Árnason, forstjóri Haga, staðfestir við Fréttablaðið að hluti fjárhæðarinnar hafi verið tekjufærður vegna meðal annars kostnaðar við málið. Hluti hafi síðan verið nýttur til þess að lækka verð til viðskiptavina á þeim vörum sem félagið hafði greitt toll af. Upphæðin sem um ræði hafi hins vegar haft óveruleg áhrif á uppgjör félagsins fyrir síðasta rekstrarfjórðung.

Félagið hafði heitið því að skila þeim fjármunum sem það fær endurgreidda vegna ólögmætrar gjaldtöku ríkisins til viðskiptavina í gegnum lægra vöruverð. Sem dæmi skiluðu Bónus og Hagkaup um 175 milljónum króna af ólögmætum gjöldum ríkisins til viðskiptavina í formi niðurgreiðslu á innfluttum kjúklingi og nautalundum á rekstrarárinu 2016 til 2017 eftir að Hæstiréttur komst að þeirri niðurstöðu að útboðsgjald ríkisins færi í bága við lög.

Finnur Árnason, forstjóri Haga

Ekki hafa fengist upplýsingar um hve há fjárhæð af þeim 157 milljónum, auk vaxta, sem héraðsdómur dæmdi í nóvember ríkið til þess að endurgreiða Högum, hafi verið notuð til þess að lækka vöruverð.

Niðurstaða Héraðsdóms Reykjavíkur var sú að útboðsgjaldið sem ríkið innheimtir fyrir heimildir til þess að flytja inn búvörur á engum eða lægri tollum væri ólögmætt. Var ríkinu gert að endurgreiða þremur innflutningsfyrirtækjum, Sælkeradreifingunni, Innnesi og Högum, samtals um 355 milljónir króna í oftekin gjöld. Dómnum var ekki áfrýjað.

Framlegð Haga nam 4.925 milljónum króna á síðasta rekstrarfjórðungi, frá desember 2017 til febrúar 2018, og var framlegðarhlutfallið 24,9 prósent borið saman við 24,6 prósent á sama tíma á fyrra rekstrarári. Var framlegðarhlutfallið umtalsvert hærra en greinendur höfðu spáð.

Athugasemdir

Auglýsing
Auglýsing

Tengdar fréttir

Viðskipti

Tók áratug að gera upp þrotabú Samson

Viðskipti

Útboði WOW lýkur í dag

Viðskipti

Fimmtíu milljóna hagnaður hjá Hlölla

Auglýsing

Nýjast

Rauðleitt í Kauphöllinni

Landsbankinn greiðir ríkissjóði 9,5 milljarða í arð

Kröfur á Samson námu 77 milljörðum króna

Björgólfur býður sig fram til stjórnar N1

VÍS lokar skrif­stofum og segir upp fólki

Vafi leikur á rekstrarhæfi Bílanausts

Auglýsing