Fjárfestar þurfa ekki að óttast að stýrivextir hækki úr 0,75 prósentum í tvö til þrjú prósent á næstu árum muni leiða til verulega lækkana á hlutabréfaverði. Þetta segir Gísli Halldórsson, sjóðsstjóri Íslandssjóða í viðtali við sjónvarpsþáttinn Markaðinn sem sýndur var klukkan níu í gærkvöld á Hringbraut.

Hann segir að reikna megi með því að stýrivextir muni hækka á næstu árum. Aftur á móti sé staðan með öðrum hætti nú og því þurfi stýrivextir ekki að verða eins háir og áður fyrr. Lán til heimila og fyrirtækja séu til að mynda að miklu leyti óverðtryggð.

Hlutabréf lækkuðu skarpt þegar COVID-19 breiddist um heiminn en nokkru síðar hækkuðu þau hratt. Frá COVID-19 hafa íslensk fyrirtæki í iðnaði hækkað um 59 prósent, fjármálafyrirtæki um 56 prósent, tækni- og fjarskiptafyrirtæki um 50 prósent, sjávarútvegsfyrirtæki um 46 prósent og smásala um 13 prósent.

Innistæða fyrir hækkunum

Gísli segir að innistæða sé fyrir þeim hækkunum sem orðið hafa á hlutabréfamarkaði og í mörgum tilfellum gott betur.

„Ef við lítum lengra aftur í tímann þá hefur íslenski markaðurinn setið eftir miðað við þá erlendu,“ segir hann.

Gísli bendir á að enn sé óvissa uppi um hvernig muni ganga að bólusetja gegn COVID-19. „Við gætum fengið bakslag,“ segir Gísli.

Fram hefur komið í Markaðnum að lægra vaxtastig leiði hærri verðmats fyrirtækja og að fé streymi á hlutabréfamarkað í leit að ávöxtun. Verðbóga er hærri en sem nemur ávöxtun á innlánsreikningum.

„Íslenskir sparifjáreigendur hafa verið ofdekraðir áratugum saman. Nú tekur raunveruleikinn við. Þú færð ekki ávöxtun án þess að taka áhættu,“ segir Gísli. Vísar í að vaxtastig á Íslandi hafi lengi verið hátt ólíkt því sem tíðkast hefur erlendis.

Hann vekur athygli á því að einungis tvö fyrirtæki af 19 sem skráð séu í Kauphöllina hafi verið rekin með tapi í heimsfaraldrinum. Samdrátturinn á helstu rekstrarstærðum hafi verið um tíu til 20 prósent en á sama tíma hafi fjármögnunarkjör batnað samhliða stýrivaxtalækkunum.

Athygli vekur að þau fyrirtæki í Kauphöllinni sem rekin eru með tapi um þessar mundir, Icelandair og Sýn, glímdu við rekstrarvanda áður en heimsfaraldurinn skall á.