Tekið hefur að hægjast á fasteignamarkaði eftir mikið líf síðasta sumar og haust, en markaðurinn náði hámarki í september 2020.
Aðeins dró úr fjölda útgefinna kaupsamninga og veltu í desember samanborið við mánuðinn á undan.
Fjöldi fasteigna sem gekk kaupum og sölum á landinu öllu í desember var 1.183 talsins og var upphæð viðskiptanna um 65 milljarðar króna. Þetta kemur fram í samantekt Þjóðskrár Íslands um veltu á fasteignamarkaði í desember 2020.
Þegar desember er borinn saman við nóvember fækkar kaupsamningum um 14,3 prósent og velta lækkar um 8,1 prósent. Á höfuðborgarsvæðinu fækkaði samningum um 14,7 prósent á milli mánaða og velta lækkaði um 5,1 prósent. Kaupsamningum fækkar þó minna á milli desember og nóvember en mánuðinn þar á undan þegar kaupsamningum fækkaði um 24 prósent og velta lækkaði um 22,3 prósent.
