Gunnar Ágúst Beinteinsson hefur verið ráðinn framkvæmdastjóri mannauðs á Landspítala. Gunnar hefur farsæla reynslu af mannauðsmálum, stefnumótun, rekstri og stjórnun. Þetta kemur fram í tilkynningu frá spítalanum.

Hann tekur við starfinu af Ástu Bjarnadóttur, sem gegndi starfinu í fimm ár. Hún mun gegna starfi framkvæmdastjóra mannauðs til 1. janúar næstkomandi.

Gunnar lauk prófi í viðskiptafræði frá Háskóla Íslands árið 1991 og meistaranámi með áherslu á stefnumótun og stjórnun frá Viðskiptaháskólanum í Kaupmannahöfn (CBS) árið 2002.

Gunnar hóf störf hjá Actavis Group árið 2004 sem forstöðumaður stefnumótunar og frá árinu 2006 sem framkvæmdastjóri mannauðsmála. Árið 2015 varð hann framkvæmdastjóri rekstrar og mannauðsmála hjá Xantis Pharma AG í Sviss. Frá því fyrr á þessu ári hefur hann starfað við eigið ráðgjafafyrirtæki í Sviss.

Gunnar spilaði handbolta með FH og íslenska landsliðinu á árunum 1985-2000.